Паян - чǎваш чĕлхи кунĕ. Чăваш Республикин Аслă Канашĕн Президиумĕ 1992 çулхи апрелĕн 9-мĕшĕнче кăларнă йышăнăвĕ тăрăх Чăваш чĕлхи кунне кăçалхипе 20-мĕш хут паллă тăватпăр. Вăл чăваш халăхне çутта кăларакан Иван Яковлевăн çуралнă кунĕпе пĕр килет. Иван Яковлевăн тивлечĕпе, вăл тунă алфавит витĕмĕпе тăван халăхăмăр вулама-çырма пуçланă. Çавăнпах апрелĕн 25-мĕшĕ чăваш халăхĕшĕн икĕ уявпа палăрать.
Тăван чĕлхемĕре сума суса пур çĕрте те тĕрлĕ мероприятисем йĕркелеççĕ. Курнавǎшри пĕтĕмĕшле пĕлÿ паракан вǎтам шкулта вара «Чǎваш чĕлхи – тǎван чĕлхе» литературǎпа музыка композицийĕ иртрĕ. Унта 5-мĕш класра вĕренекенсем янǎравлǎ сǎвǎсемпе савǎнтарчĕç, юрǎсем шǎрантарчĕç, 7-мĕшсем сценка кǎтартса пачĕç. Пĕчĕк артистсем вĕренÿре çеç мар, юрă-ташăра та маттур пулнине кашниех хăй куçĕпе курса савăнчĕ.
Паянах «Чǎваш чĕкеçĕ» вǎйǎ-конкурсра палǎрнисене, республикǎри «Ăслǎлǎхри пĕрремĕш утǎмсем-3» наукǎпа практика конференцийĕнче призерсен йышне кĕнисене тата ««EXCELSIOR-2012» конференци çĕнтерÿçисене чысларĕç.