Ачасене Елчĕк районĕнчен тухнă мухтавлӑ çынсен кун-çулĕпе, нумай енлĕ  пултарулăхĕпе,  пархатарлă та сумлă ĕçĕсемпе паллаштарса вĕсемпе тивĕçлипе мухтанас, хисеплес  туйăма аталантарас, вĕсенчен  ырǎ тĕслĕх илме вĕрентес тĕллевпе районта та, шкулта та тĕрлĕ мероприятисем йěркелесе ирттерчěç.

 Паян, раштав уйăхĕн 26-мěшěнче,  район администрацийĕн вĕренӳпе çамрăксен политикин пайĕ тата  «Елчĕк ен ентешлĕхĕ» обществăлла организацийĕ Паллă ентешсен çулталăкне тата Елчĕк районĕн 95 çулхи юбилейне халалласа çырнă «Елчĕк çĕрĕ пултаруллă çынсемпе пуян» сочиненисен конкурсне  пěтěмлетрěç. Унта Курнавăшри  пěтěмěшле пěлӳ паракан вăтам шкул ачисем те хутшăнчěç.

Хаваслă уяв Çěнě çул чăрăшě умěнче иртрě. Уява  Елчěк  муниципалитет округěн пуçлăхě  Л.В.Левый уçрě. Вăл пуçтарăннисене Çěнě 2023 çул ячěпе саламласа çирěп сывлăх, çитěнӳсем тума ăнăçу сунчě. Малалла «Елчěк  ен ентешлěхěн»  ертӳçи Ю.М. Карпов конкурс çěнтерӳçисемпе призерěсене  Хисеп хучěсемпе хаклă парнесем парса чысларě. Призерсен йышěнче  Курнавăш шкулěн вěренекенěсем  -  Микихина Надеждăпа  Корнилов Кирилл пурри  вара савăнтарчě.

Çěнě çул уявě  Тěп лапамра хаваслă иртрě.  Уява Хěл мучипе Юр пике тата юмахри сăнарсем  илем кӳчěç.

Конкурс призерěсене тата вěсене конкурса хатěрленě В.Н.Вороновăпа Н.М.Кузнецовăна  саламлатпăр,  малашне те  çитěнӳсем тума  сунатпăр.