Елчěк ен, Елчěк районě, Курнавăш ялě пирěншěн – Тăван çěр-шыв пуçламăшě. Кунти тулăх уй-хирсемпе çарансем, çырмасемпе тăрă çăлкуçсем пире пурне те вăй-хăват парса çитěнтереççě. Кунта мăн асаттесемпе асаннесем хăйсен кун-çулне ирттернě, çак пархатарлă та тулăх çěр çинче тар юхтарса ěçленě. Вěсем ěмěртен пыракан ăс-хакăлне, пěлÿлěхне, тăрăшулăхне çитес ăрусене халалланă.

Елчěк муниципаллă округěн пěтěмěшле пěлÿ  паракан Курнавăш вăтам шкулěнчи «Кулă» кану лагерьне çӳрекен  ачасем  хăйсем çуралса ÿснě тавралăхпа, мăн асаттесемпе асаннесен йăли-йěркипе, хамăр тăрăхри кайăк, чěр чун, йывăç-курăк, кăмпа ячěсемпе паллашас тěллевпе çул çÿреве тухрěç. Тăван тавралăх илемěпе киленчěç, çул çинче тěл пулакан йывăç-курăкпа паллашрěç, вěсем çинчен тěплěнрех пěлес тесе тăрăшрěç, воспитательсене тěрлěрен ыйтусем пачěç.

Ун хыççăн ялти библиотекăра  йěркеленě куравпа паллашрěç. Мăн  асаттесемпе асаннесем ěçлесе пурăннă ěç хатěрěсемпе, вěсен тумтирӗсемпе, йăли-йěркисемпе кăсăкланчěç.

Ачасемшěн паянхи çул çÿрев кăсăклă пулчě, вěсем нумай çěннине пěлчěç.