Кĕçĕн класс ачисене çамрăк геройсен паттăрлăхĕпе паллаштарас, çын кăмăл-сипечĕн пурнăç пахалăхĕсене (тăван çĕр-шыва юратни, тивĕçлĕх, яваплăх, паттăрлăх кăтартма хатĕр пулни) ăнланса илме пулăшас, тăван çĕр-шывăн историне тата халăхăн паттăрлăхне асра тытма тивĕç пуррине ăша хурас туртăма малалла аталантарас тĕллевпе авăн уйăхĕн 18-мĕшăнче, Порфирьева Ф.Ю. Курнавăшри пӗтӗмӗшле пӗлÿ паракан вăтам шкулта 1, 3-мӗш  класра вӗренекенсемпе «Зоя. Зоя Космодемьянская çуралнăранпа 100 çул çитнӗ май» класс сехечӗ ирттерчӗ.

Чи малтанах класс ертÿçипе ачасем Аслă Тăван çĕр-шывăн историн сыпăкĕсене аса илчĕç, вăрçа  аслисемпе пĕрле çамрăк ачасем хутшăннине сăнлакан сăн ÿкерчĕксене тишкерчĕç, çамрăк геройсене сăнласа каласа пачĕç, тăшман пирĕн çĕр çине кĕрсен çынсен пурнăçĕ еплерех улшăнни çинчен калаçрĕç, Федераци спикерĕн сăмахне çырса илнĕ ролике пăхрĕç, чăваш халăх поэчĕ Петĕр Хусанкай фашистсем çакса вĕлернĕ Зоя Космодемьянскайăна халалласа çырнă «Таня» поэмăна итлерĕç. Зоя Космодемьянскайăн пурнăçĕ паттăрлăхăн уйрăмах кăтартуллă тĕслĕхĕ иккенне, вăл Совет Союзĕн пĕрремĕш Герой хĕрĕ шутланнине ăса хыврĕç. Ун хыççăн вĕренекенсем Мускав облаçĕн Петрищево ял музейĕн экспозицийĕ çинчен видео сыпăкне курса Зоя Космодемьянскайăн, геройăн паха енĕсем   çинчен тĕплĕнрех пĕлчĕç.

Аслă Тăван çĕр-шывăн вăрçи çулĕсенче хастарлăх кăтартса ача чухнех паттăра тухнă  Леня Голиков, Валентин Котик, Витя Коробков  çинчен  видео курса ачасем хăйсен тавракурăмне ÿстерчĕç.

Юлашкинчен вĕренекенсем хăйсен пурнăçне шеллемесĕр Тăван çĕр-шыва хÿтĕленĕ паттăрсен  ячĕсене ĕмĕр асра тытма, вĕсем пек чăтăмлă, хăюллă, паттăр пулма, шкулта тăрăшса вĕренме  сăмах пачĕç.