Шкул ачисене тăван çĕр-шыв кинематографĕн историйĕпе паллаштарас, анимаципе киноиндустри профессийĕсемпе кăсăклантарса ярас, тăван çĕр-шыв культурин пайĕ пулса тăракан кинематографпа анимаци пĕлтерĕшне ăнланса илме май тăвас, кинематографпа анимацие аталантарма нумай вăй хунă çынсене хисеплеме кăмăл-сипет енчен ăс парас тĕллевпе юпа уйăхĕн 16 -мĕшĕнче, Порфирьева Ф.Ю. Курнавăшри пӗтӗмӗшле пӗлÿ паракан вăтам шкулта кӗçĕн  класра вӗренекенсемпе «Экранăн леш енче. Раççейре кино 115 çул» черетлĕ класс сехечӗ ирттерчӗ.

          Занятине класс ертÿçи музыка кÿртĕмĕнчен пуçларĕ, ачасене кинона халалланă «Фильм, фильм, фильм» юррăн сыпăкне итлеттерчĕ. Ун хыççăн кинофильмсене, мультфильмсене мĕншĕн юратни, килĕштерни çинчен ачасемпе уçă калаçу йĕркелерĕ.     

    Малалла класс ертÿçи кино хăçан тата мĕнле пуçланни, 1924-мĕш çулта Мускавра уçнă киностуди мĕн ятлă пулни, чăваш çĕрĕнче киностудие хăш çулта уçни, студийĕ мĕн ятлă пулни, мультфильмсене епле ÿкерни çинчен кĕскен каласа пачĕ.

   Вӗренекенсем «Мосфильм» киностудие 25 çула яхăн ертсе пыракан Карен Георгиевич Шахназаров калаçнине те  итлерĕç, вăл кăларнă паллă кино лентисемпе паллашрĕç, «Тăван çĕр-шывра кино аталанни историйĕнчен» ролике пăхрĕç. Икĕ енлĕ хутшăнăва кĕрсе «Эпир юратакан фильмсем» вăййа вылярĕç». Вăйă  1-мĕш раунд «Фильм геройне пĕл»,  2-мĕш раунд «Героя палласа ил те юрра малалла юрла», 3-мĕш раунд «Чарăннă кадр», 4-мĕш раунд «Калейдоскоп» темăсемпе иртрĕ, ачасем тăрăшса вылярĕç, мультфильмсене чылайăшне палласа илчĕç, пĕчĕк шăпăрлансем художник пулса Раççей киновĕ 115 çул тултарнине халалласа эмблема ÿкерчĕç.

    Юлашкинчен кӗçĕн  класра вӗренекенсем Раççейĕн пирĕн çĕр-шывпа унăн халăхĕ çинчен каласа паракан пирвайхи фильмĕсене тунă çынсене, Раççейĕн авалтан пыракан паха енĕсене хÿтĕлекен пирвайхи илемлĕ тата мультипликаци фильмĕсене ÿкернĕ киноçăсене, историпе вăрçă ыйтăвĕсене тишкернĕ кино ăстисене тав турĕç.