2024 çулхи  çу уйăхěн 22-мěшěнче  Елчěк муниципаллă округěн  Курнавăш шкулěнче вěренекенсемпе ашшě-амăшěсем «Пушкин картти» проектпа усă курса Константин Иванов ячӗллӗ Чӑваш патшалӑх академи драма театрӗн «Айăпсăр чун» спектакльне пăхрěç.  Унăн режиссерĕ - ку театрăн артисчĕ Алексей Герасимов. Авторӗ - Киев хулинче çуралса ӳснĕ тӗнчипе палӑрнӑ драматург тата сценарист Мария Ладо. Пьесăна чăвашла Галина Антонова куçарнă. Куçруçă чĕлхи çăмăл та яка. Çавăнпа спектакльти сюжета ăнланма питĕ çăмăл.

«Айӑпсӑр чун» постановкăра çынсемпе пĕрлех килти чĕрчунсен пурнăçĕ сăнланнă. Вĕсем те хăйсем хушшинче калаçаççĕ, кил хуçисемпе пулса иртекен пулăмсене сăнаса сӳтсе яваççĕ, пăшăрханаççĕ.

Спектакль куракана шутламалăх нумай ыйту кăларса тăратать, пурнăç çине урăх куçпа пăхма хистет.